VIDEO: Osmajić neumoljiv – treći meč zaredom strijelac u Čempionšipu!

Milutin Osmajić nastavlja da blista u dresu Prestona. Crnogorski napadač postigao je treći gol u isto toliko kola Čempionšipa, potvrdivši da se nalazi u sjajnoj formi na startu nove sezone.

Nakon što je tresao mreže Kvins Park Rendžersa i Lestera, danas je bio koban i za Ipsvič. Preston je slavio 1:0, a Osmajić je već u 11. minutu iskoristio penal koji je sam izborio. Iako nepisano pravilo često kaže da igrač nad kojim je dosuđen jedanaesterac ne bi trebalo da ga izvodi, popularni „Mili“ nije imao dilemu – sigurno je matirao golmana gostiju i donio svom timu vrijedna tri boda.

Do kraja meča Osmajić je ostao na terenu i još jednom bio jedan od najopasnijih u redovima domaćina, dok je drugi crnogorski reprezentativac u taboru Prestona, Andrija Vukčević, dobio šansu u finišu susreta (ušao u 86. minutu umjesto Tjerija Smola).

Preston tako nastavlja savršen niz i uz Osmajića već sada ima golgetera koji nosi ekipu u najjačem drugoligaškom takmičenju na svijetu.